«Ուրիշ նորությունների» հյուրերն են Մարո Մուրադյանի անվան «Ակունք»

««Ակունքն» այսօր աշխատում է «Սասունցի Դավիթ» էպոսի վրա․ վերականգնում ենք էպոսն ամբողջությամբ՝ երաժշտական տարբերակով։ Կարծում ենք՝ հաջորդ տարի կներկայացնենք և հուսով ենք՝ ոչ միայն Հայաստանում, այլ նաև տարբեր երկրներում»։ «Ուրիշ նորությունների» հյուրերն են Մարո Մուրադյանի անվան «Ակունք» պետական ազգագրական համույթի մեներգչուհիներ Արեգ Միքայելյանը և Աննա Թովմասյանը: Նրանք պատմել են նաև տարազների, 67 տարբերակ «Թելոների», «Նարեների», «Կտրիճ Դավոյի», հարսանեկան ծեսերի երգերի, բանահավաքչական բարդ աշխատանքի մասին՝ ինչպես են բանահավաքները երգացրել ու ձայնագրել մամիկ-պապիկներին՝ դաշտերում աշխատելիս, հարսանիքներում ու օրորոցային երգելիս։ «Միջավայրը շատ կարևոր է․ հարսանիքից դուրս ոչ ոք «Թագվորագովք» չէր երգի, մինչև երեխային չքնացներ՝ օրորոցային չէր երգի, եթե հողը չի վարում, ասես՝ «Գութաներգ» երգի, չի կարող մտնել այդ կերպարի մեջ, պարտադիր պետք է աշխատանքի պրոցեսում երգեր․ հենց դա է պատճառը, որ Կոմիտասն էլ երգերը հավաքագրում էր հենց տվյալ միջավայրում՝ հարսանիքում էր գրառում հարսանեկան երգերը և այլն»։ Այս տարի «Ակունքը» հիմնադրման 50-ամյակն է տոնելու․ համույթի երգչուհիները հրավիրեցին նոյեմբերի 13-ին, ժամը 19:00-ին Ա․Խաչատրյան համերգասրահում կայանալիք հոբելյանական համերգին։