Հոկտեմբերի 26-30-ը Երևանում տեղի կունենա ֆլեյտայի առաջին միջազգային փառատոնը

«Ուրիշ նորությունների» հյուրերն են՝ Ֆլեյտայի երևանյան առաջին միջազգային փառատոնի հիմնադիր, գեղարվեստական ղեկավար և պրոդյուսեր Վարդան Վիրաբյանը և Հայաստանի ազգային ֆիլհարմոնիկ նվագախմբի մենակատար և կոնցերտմայստեր Նարեկ Ավագյանը։ Հյուրերը խոսել են փառատոնի շրջանակներում կայանալիք համերգների, վարպետության դասերի, դասախոսությունների և հանդիպումների մասին՝ միջազգային հեղինակություն վայելող ֆլեյտահարների մասնակցությամբ: Փառատոնի օրերին տեղի կունենա ֆլեյտաների և աքսեսուարների ցուցահանդես։ Ֆլեյտաների մոսկովյան կենտրոնի կողմից կներկայացվեն համաշխարհային հայտնի բրենդների նմուշներ։ Վարդան Վիրաբյանն ու Նարեկ Ավագյանը անդրադարձել են նաև գործիքի առանձնահատկություններին․ պարզվեց, որ ի տարբերություն փայտյա-փողային գործիքների, ֆլեյտան որքան նոր՝ այնքան լավ, իսկ ոսկյա ֆլեյտայի հնչողությունը տարբերվում է արծաթյա գործիքից։ Փառատոնը կանցկացվի Առնո Բաբաջանյանի անվան համերգասրահում։