Ինչպե՞ս Ռոստրոպովիչի ջարդված անձրևանոցը հայտնվեց Սարյանի տուն– թանգարանում

Մարտիրոս Սարյանի տուն թանգարանում է պահվում ռուս հայտնի թավջութակահար Մստիսլավ Ռոստրոպովիչի անձրևանոցը։ 1969 թ–ին երաժիշտը Երևանում համերգ էր տալիս։ Մարտիրոս Սարյանը հիվանդության պատճառով չկարողացավ ներկա լինել։ Ռոստրոպովիչը որոշեց անձամբ գալ Սարյանի տուն ու նվագել նրա համար։ Այդ տարիներին նրա նկատմամբ լարված վերաբերմունք կար խորհրդային իշխանությունների կողմից։ Հատուկ ծառայությունների աշխատակիցները հետևել էին նրան ու որոշել ստուգել։ Կասկածելով, որ նրա անձրևանոցի մեջ ինչ–որ բան կարող է լինել՝ նրանք ջարդել էին երաժշտի անվանական անձրևանոցի պոչը։ Վերջինս արդեն ջարդված անձրևանոցը թողել էր Սարյանների տանը։ Նկարչի որդին` կոմպոզիտոր Ղազարոս Սարյանը, լավ հասկանալով իրի արժեքը, պահել էր այն։ Հետագայում անձրևանոցը վերանորոգվել ու դարձել է թանգարանի կարևոր նմուշներից մեկը։