Эх, һабантуй, һабантуй, Гөрләп үтә һабантуй! Уйын көлкө, йыр бәйгеләр - Эх, күңелле һабантуй!

💢Туғандар, дуҫтар, ауылдаштар йыйылды. Ейәнсура районы Сирғол ауылында “Туғанлыҡ байрамы“ үтте. Сараны ойоштороусылар барыһынан да бигерәк ҡояшлы матур көн теләне! Теләктәре ҡабул булды Сирғолдарҙың - төшкә тиклем ямғыр яуып алһа ла, артабан көн аяҙып китте, сара күтәренке кәйефтә уҙҙы! 🎶Байрам тантанаһы яңыртылған мәҙәниәт йортон ҡотлауҙан башланды. Район хакимиәте башлығы Юланов Дәмин Марат улының ҡотлауы сараның мәртәбәһен күтәрҙе. Дәмин Марат улы үҙенең сығышында халыҡты, ҡайтҡан ҡунаҡтарҙы байрам менән тәбрикләп, ауыл тотҡаһы булған кешеләргә айырым рәхмәт әйтеп, Рәхмәт Хаты тапшырҙы. 2017 йылдың Ауылдаштар байрамында Сирғолдоң иң йәш граждандары тип билдәләнгән бәпәйҙәрҙең бөгөнгө көндә сәхнә йондоҙҙары икәнен күрҙек. Махсус хәрби операция сафтарында ауыл тарихына данлы биттәр өҫтәгән егеттәребеҙгә дан һәм рәхмәт, уларҙың яҡындарына күстәнәс тапшырылды. Шулай уҡ ҡыуаныслы ваҡиғалар билдәләп кителде: яңы барлыҡҡа килгән йәш ғаиләләр, 9 - сы, 11 - се класты тамамлаған сәхнәбеҙ йәме, йондоҙсоҡтарыбыҙ. Алтын туй ауылыбыҙҙа быйыл - оло хөрмәткә лайыҡ, ихтирамлы, иғтибарлы ғаилә Мөхәмәт һәм Зөбәйҙә Юлдашбаевтар билдәләй был матур датаны. Байрамыбыҙҙы үткәреү өсөн күп көс һалған Байдәүләт биләмәһе башлығы Ҡолмөхәмәтов Шәһит Ғимран улы шулай уҡ байрам менән ҡотлап, ауылыбыҙға йылдар буйына хеҙмәт иткән, уны йәшәткән, йәмләгән ауыл патриоттарына һәм ауылдың данын тотоу, күтәреү, яҡшы исемен йөрөтөүселәргә Грамоталар тапшырҙы. Бөтә сығыштар йыр - моңға үрелеп барҙы. Искәнйәровтар, “Хәтирә“ фольклор төркөмө, “Ҡарасәй“ халыҡ фольклор төркөмө, Айназ Юлдашбаев, Таисия Николаевнаның сығыштарын халыҡ яратып ҡабул итте. 🌺Ғаилә йылында фамилиялар концерты бара Сирғол ауылында һәм ошо мәртәбәле “Туғанлыҡ байрамы“ нда ауылыбыҙҙың иң оло төп нәҫеле Тайсиндар “Туғанлыҡ - быуындар бәйләнешендә“ исемле шәп концерт бүләк итте. Концертты юғары кимәлдә ойоштороп үткәргән сәхнәбеҙ ветераны Сулпан ағай Тайсин, әүҙем ҡыҙҙарыбыҙ Лена һәм Альмира Мәхмүт ҡыҙҙарына ауыл халҡы исеменән ихлас рәхмәт! Барлыҡ әртистәргә, Сирғол ауылы егете, мәҙәниәт йорто сәхнәһен дә, Мыйыҡ кисеүе сәхнәһен дә яңғыратҡан үҙебеҙҙең Илсурыбыҙға ҡайнар сәләмдәр һәм мең рәхмәт! ⚡Байрамға бик күп ҡунаҡтар килгәйне. Берәүҙәр яҡын - тирә ауылдарҙан булһа, икенселәр йыраҡ араларҙы яҡынайтып, йыраҡтарҙан ҡайтҡан. Улар тыуған ауылдарына аяҡ баҫыу, нәҫел - нәсәптәре менән күрешеүҙән хисләнеп, сәхнәгә сығып, һүҙ алды. Шуларҙың береһе - Ноғоманов Рафиҡ Ғүмәр улы. Ул: “Ауылымдың лайыҡлы шәхестәренә, Сирғолдоң ҡотон, нурын һаҡлап йәшәгән ауылдаштарыма сикһеҙ рәхмәтлемен“, - тип әүҙемдәрҙең исемдәрен берәм - берәм атап күстәнәстәр таратты, хатта күстәнәстәр байрамдың икенсе өлөшөндә ялан сәхнәһендәлә хужаларын тапты. 🎤Рәхмәт һеҙгә, беҙҙең дуҫтарыбыҙ, бер бөгөн генә түгел, ә даими хеҙмәттәшлектә булған спонсорҙарыбыҙ: Фуат Толомбаев, Илдар Азнағолов, Флүр һәм Фәнүр Мәсәғүтовтар, Рафиҡ Тайсин, Арслан Әбизов, Шәһит Ҡолмөхәмәтов, Зилбәр Иҙрисова, Наиля Үҙәнбаева, Таисия Николаевна, Рәмилә Ноғоманова, Лена Вәлитоваға оло рәхмәттәребеҙҙе еткерәбеҙ. “Йомарт ҡулға йомарланып мал инә“, - ти халыҡ мәҡәле. Һеҙгә лә шулай булһын, хөрмәтле ҡыҙҙар - егеттәр! ✨Был көндө 45 йыл элек Сирғол мәктәбен тамамлаған класташтар ҙа осрашты. Улар: “Мәктәпте 1979 йылда тамаланыҡ. Класыбыҙ менән яҡшы уҡыныҡ. Үҙ - ара дуҫ булдыҡ, кәрәк саҡта бер - беребеҙгә ярҙам ҡулы һуҙҙыҡ. Бөгөнгө осрашыу бик иҫтәлекле булды, яҡын араларҙа ҡайта алмаған ҡыҙҙарыбыҙ бөгөн беҙҙең арала“, - тип һөйләне. “Туғанлыҡ байрамы“ төштән һуң яланда дауам итте. Спорт һәм халыҡ уйындары ҡыҙыу барҙы. Унда олоһо ла, кесеһе лә ҙур теләк менән сәмләнеп ҡатнашып, бүләктәр отто. Сәхнәнән йыр - моң, уйын - көлкө тынманы. 🎁Доғаны күп ҡабатлағандан, доға иҫкермәй. Ошондай ҙур, әһәмиәтле, йөкмәткеле “Туғанлыҡ байрамы“н беҙ күмәкләп әҙерләп үткәрҙек. Тағы ла бер рәхмәттәремде әйтәһем килә - сценарий авторы, өлкән дуҫым, кәңәшсем Гөлзирә Йәмил ҡыҙына, өмәләрҙә ҡатнашҡан әүҙем ҡыҙҙар - егеттәргә, күршеләремә, йүгереп, осоп - ҡунып йөрөгән “Яҙлауыр“ урамына, ойоштороусы, эште башлап аҙағына еткергән старостабыu