АШИМ СИКАЛИЕВ: «ЯС ПАН КЫЗ». 1960-шы йыллар.

«ЯС ПАН КЫЗ» Яс кызды суьеди эм ога «Сени каерден табарман» дейди. Кыз сонда явап береди: Кыз Кара агашта карагай Коькем терек мен болып Шешекей атып, елпилдеп, Ерге битсем - кайтерсинъ? Яс Коькем терек сен болып (дейди ав), Ерге де биткен сен болсанъ, Темир балта мен болып, Шавып алсам кайтерсинъ? Кыз Темир балта сен болып, Шавып алган сен болсанъ, Темир сабан мен болып, Ерге батсам кайтерсинъ? Яс Темир сабан сен болып, Ерге баткан сен болсанъ, Сегиз оьгиз мен болып, Юлкып алсам кайтерсинъ? Кыз Сегиз оьгиз сен болып, Юлкып алган сен болсанъ, Ак куврайынъ мен болып, Отка туьссем кайтерсинъ? Яс Ак куврайым сен болып, Отка тускен сен болсанъ. Темир кыскыш мен болып, Кысып алсам кайтерсинъ? Кыз Темир кыскыш сен болып, Кысып алган сен болсанъ, Кызыл тары мен болып, Яйрап ятсам кайтерсинъ? Яс Кызыл тары сен болып, Яйрап яткан сен болсанъ, Кызыл кораз мен болып, Шоьплеп алсам кайтерсинъ? Кыз Кызыл кораз сен болып, Шоьплеп алган сен болсанъ, Бал тегенек мен болып, Ярга битсем кайтерсинъ? Яс Бал тегенек сен болып, Ярга биткен сен болсанъ, Балшыбынынь мен болып, Конып сорсам кайтерсинъ? Кыз Балшыбыным сен болып, Конып сорган сен болсанъ, Денъиз балык мен болып, Сунъип кетсем кайтерсинъ? Яс Денъиз балык сен болып (дейди ав), Сунъип те кеткен сен болсанъ, Кендир йылым мен болып, Сузип алсам кайтерсинъ? Кыз Кендир йылым сен болып, Сузип алган сен болсанъ, Коьк коьгершин мен болып, Коькке ушсам кайтерсинъ? Яс Коьк коьгершин сен болып, Коькке ушкан сен болсанъ, Кара лашын мен болып, Кагып алсам кайтерсинъ? Кыз Кара лашын сен болып, Кагып алган сен болсанъ, Аллахтан эмир келип, Оьлип кетсем кайтерсинъ? Яс Аллахтан эмир келип (дейди ав), Оьлип те кеткен сен болсанъ, Ак кебининъ мен болып, Шырмалып ятсам кайтерсинъ? Кыз Ак кебиним сен болып, Шырмалып яткан сен болсанъ, Ер астында кабырда Сулайып ятсам кайтерсинъ? Яс Ер астында кабырда Сулайып яткан сен болсанъ, Баш казыгынъ мен болып, Кадалып калсам кайтерсинъ?