УКЫТУЧЫ ВЕНЕРА ВАХИТОВА

Ул сабый чактан ук укытучы булырга, балалар белән эшләү турында хыяллана. Аның бу теләге шулчаклы көчле була ки, бары тик бишле билгеләренә генә укыса да, ул сигезенче сыйныфны тәмамлау белән Арча педагогия училищесына укырга китә. Һәм менә шул еллардан башлап ул 70 елга якын һаман да мәгариф тармагында хезмәт итә... Сүзебез- СССР халык мәгарифе отличнигы, Ульяновск өлкәсенең “Иң яхшы ана теле укытучысы” дигән мактаулы исемгә лаек булган мәгариф ветераны, актив җәмәгать эшлеклесе Венера ханым Вахитова хакында бара. Укытучылар көне алдыннан безнең хәбәрчебез Рамис Сафин Венера апа белән очрашып аны беренчеләрдән булып һөнәри бәйрәме белән котлап кайтты.