Майҙың һуңғы сәләме, йәки ғәрәсәт аямай

Ҡыйыҡһыҙ ҡалған йорттар, ауған ағастар, ҡара ергә ҡалған баҫыуҙар. Кисә кис республика буйлап үткән ғәрәсәт Бүздәк, Саҡмағош, Шаран, Дүртөйлө һәм башҡа райондарҙа хужалыҡтарға зыян килтерҙе. Ауылдар утһыҙ ҡалды. Әле дауыл эҙемтәләре бөтөрөлә, күрелгән зыян күләме иҫәпләнә. Тәбиғәттең аяуһыҙ көсө Саҡмағош районының Йомаш, Митрәй-Әйүп, Иҫке Үҙмәш, ауылдары буйлап үткән. Йөҙйәшәр ағастарҙы ел-дауыл ҡәләм һындырған һымаҡ тураҡлаған. Ауыл халҡы уны бысып утынға турай. Профнастил ҡыйыҡ быҙауҙар торған кәртә эсенә килеп төшкән. Ҡойон Базы ауыл хужалығы предприятиеһы фермаларын да урап үтмәгән. Быҙауҙар ятҡан бокстарҙы төрлө яҡҡа тәгәрәткән. Һауынсыларға һыйырҙарҙы төнгө ун икегә тиклем һауырға тура килгән. Дауыл эҙемтәләре бөтөрөлә, район буйынса күрелгән зыян күләме иҫәпләнә. Боҙ-борсаҡтан хужалыҡтың йөҙҙәрсә гектар сәсеүлектәрен ағыҙған. Яңынан сәсергәме-юҡмы – алдағы көндәрҙә билдәле буласаҡ. Ауыл хужалығы предприятиеһы биналары страховкаланған, ә сәсеүлектәрҙе әле өлгөрмәгәндәр.