Дзæуыджыхъæуы уыд ирон бæгæныйы фестиваль

Ирон бæгæны фыцгæйæ, алы æфсин дæр алыхуызон сыгъдон скæны. Фæлæ хуымæллæг алы рецепты дæр, æнæмæнг, ис. Дзукъаты Дмитрийы бинонтæ сæ фынгыл алы бæрæгбонмæ дæр хиконд нозт æрæвæрынц. Скæны йæ сæ нана, йæхи нана йæ куыд сахуыр кодта, афтæ. Институты бæгæныйы фестиваль уыдзæн, уый куы базыдта лæппу, уæд дзы архайынвæнд скодта. Йæ зонындзинæдтæ равдыста, йæ бæгæны алкæй зæрдæмæ дæр фæцыд. Хуыз, ад, фынк: хъуамæ зæрдæ райа йæ хæрздæфмæ дæр. Ацы æууæлтæм хъус дарынц специалисттæ дæр. Ирон бæгæныйы фестиваль сбастой Лæгты Дзуармæ кувæн къуыриимæ. Ацы аз архайджытæ уыдысты 24 — хæххон, металлургон, электромеханикон, информацион технологитæ æмæ электронон факультеты студенттæ. Бæрæгбон рауад хъæлзæг. Ирон бæгæныйы хæрзаддзинад базыдтой сыхаг регионтæй студенттæ дæр.