1-январда эң аз пенсия, пособие 7300 сом болушу шарт. Өкмөт каражат таба элек

Конституция боюнча 2023-жылдын 1-январынан тарта кыргызстандыктар 7 300 сомдон кем эмес пенсия жана жөлөк пул алышы керек. Бирок бул маселени өкмөт чече элек. Sputnik Кыргызстандын кабарчысы финансы министри Алмаз Бакетаевден “Баш мыйзамдагы ушул норманы аткарууга даярсыздарбы?“ деп сурады. Цитата “Чынын айтканда, бул аябай курч маселе. Мисалы, менин кесиптешим, башкармалыктын башчысынын үч баласы бар. Ал иштебей калса ар бир баласына 6 миң сомдон (пособие — ред.) алып 18 миң сом менен отура берет, ишке келбей эле. Анын азыркы алган айлыгы 22 миң сом. 8 саат иштеп, түшкү тамак ичип, анан кайта кетип чыгымы көбүрөөк. Андан көрө бирөөнүн багуусунда болуп үйдө жатып эле ошол пособиени алганы жеңил. Мына ушундай орчундуу маселени министрлер кабинетинде тактап жатабыз. Биз бир аз убактан кийин ушул позиция боюнча так жооп беребиз“, — деди Бакетаев. Белгилей кетсек, Конституциянын 44-беренесинин 2-бөлүмүндө “Пенсиялар, социалдык жөлөк пул жана башка социалдык жардам мыйзамда белгиленген жашоо минимумунан кем эмес жашоо деңгээлин камсыз кылууга тийиш“ деп жазылган. Бул мыйзам 2023-жылдын 1-январынан тартып күчүнө кирери белгиленген. Улуттук комитеттин маалыматы боюнча, учурда жашоо минимуму — 7 318 сом.