“Садыр аwа“ деп эле жазалы. Депутат Осмонов алфавитти өзгөртүүнү сунуштады

“Садыр ава“ дейинби же “аба“ десем болобу? Жогорку Кеңештин депутаты Айбек Осмонов тилчилерге кайрылып, алфавитти өзгөртүүнү сунуштады. “Ава“ деген сөз Ысык-Көл менен Баткенде көбүрөөк колдонулат. Мисалы, Садыр ава, Султанбай ава. Мен сүйлөгөндө “Садыр ава“ деп кайрыла берем, эгер кат жазып калсам “урматтуу Садыр “ава“ же “аба“ деп жазамбы? Биз ушуга W (дабл ю) тамгасын киргизишибиз керек. Оюңуздар кандай? “Дава“ деген да сөз бар. Китеп жазгандар дагы ушундан кыйналышат“, — деди Осмонов. Мамлекеттик тил жана тил саясаты комиссиясынын төрагасынын орун басары Жылдыз Орозобекова бул кыргыздын төл сөзү экенин айтты. “Бул илгертен “обо“ сөзүнөн пир туткан, улуу дегенден келип чыккан. Бардык дубанда эле “ава“ деп колдонулат, бирок жазылышында маселе бар. “Ава“ деп эле айта берген туура, жазылышы “аба“ болот“, — деди Орозобекова. Бирок депутат “аба“ деп жазганда “воздух“ дегендей болуп калып жатат деп нааразы болду. “Жок, “б“ менен эле жазылат, айтылганда “ава“ деп боштук менен айтылат“, — деп жооп берди Орозобекова. Аны менен катар Осмонов “А“ тамгасына үндөш дагы бир тамга киргизүү керектигин айтты. “У-ү, о-ө, с-з, к-г деген тамгалар бар, бирок “а“ тамгасында “а(э)“ жок. Чынында муну көп колдонушат, мисалы, “Жусуп ка(э)л“ деп айтат да жазганда “кал“ болуп атпайбы. Мындай тамга Казакстанда бар“, — деди депутат. Мындан улам Осмонов алфавитке жогорудагы эки тамганы кошууну сунуштады. Орозобекова ал маселени талкуулап көрүшөрүн айтты. Ал эми Тил комиссиясынын төрагасы Каныбек Осмоналиев алдыда алфавиттик реформа боло турганын, ошондо караларын билдирди.