САЮЗ БЕЛАРУСКАЙ МОЛАДЗІ

Саюз беларускай моладзі (СБМ), беларуская маладзёвая нацыяналістычная арганізацыя. Заснаваная ў чэрвені 1943. Дзейнічала легальна, з дазволу нямецкіх акупантаў, на тэрыторыі генеральнай акругі «Беларусь». Займалася выхаваннем беларускай моладзі ў духу беларускага патрыятызму, любові да сваёй Бацькаўшчыны. Шэфам-правадніком Галоўнага Штабу СБМ быў Міхась Ганько. Галоўным друкаваным органам арганізацыі быў часопіс «Жыве Беларусь!». Да чэрвеня 1944 СБМ налічваў у сваіх шэрагах некалькі дзесяткаў тысяч маладых людзей. Частка гадаванцаў арганізацыі пасля ўцёкаў нямецкіх войскаў пры наступе Чырвонай арміі перайшла ў антысавецкае падполле.