NOWПРОСТ #01 / Андрэй Кавальчук: Год міну, а яны весяляцца.

Тэатр – гэта людзі. Менавіта з гэтымі словамі пачаўся наш вольны шлях год таму. Цэлы сезон мы адкрывалі сябе наноў, час ад часу глядзелі адно на аднаго зусім іншымі вачыма. І самі здзіўляліся таму, хто мы ёсць, якія мы ёсць і на што мы здольныя ў такія няпростыя часы. Ці было цяжка? Безумоўна. Ці змяніліся мы за гэты час? Бясспрэчна. Наперадзе новы сезон, і ён не абяцае быць прасцейшым. Але ёсць абсалютна простая рэч, якая штодня дае надзею і сілы ісці далей, – ваша падтрымка і ваша вера. Найноўшая гісторыя тэатра адзначыла 26 жніўня як дзень, калі Купалаўцы ў бальшыні сваёй атрымалі працоўныя кніжкі і, яшчэ самі таго не ведаючы, паклалі пачатак Незалежнай тэатральнай групе “Купалаўцы”. Складана было, канечне, такое прадказаць, але мы адкрываем 102-гі сезон! І выглядае на тое, што ён будзе не менш легендарны за папярэдні! Паважаныя гледачы, мы пачынаем!