Айына 100 кг эт керек. Бишкектеги реабилитациялык зоопарк

Бул ирет Sputnik Кыргызстан агенттиги Бишкек шаарындагы “Зоо Бишкек“ реабилитациялык борборуна барды. Мында жалпы 300дөй жаныбар, канаттуу багылат. Кадимки зоопарктан айырмасы чоң. Анткени “Зоо Бишкек“ борбору бир да жаныбарды сатып алган эмес жана сатпайт. Бул жайга келип калган жаныбар, канаттуу, куштардын ар биринин өз тарыхы бар. Зоотехник Азамат Алтынбеков адамдар жаныбарларды кичинекей кезинде балдарына оюнчук катары сатып беришерин белгиледи. “Балдар ал жаныбарга алаксып, кызыгы тарайт. Кээ бирлери жапайы, чоңоюп кеткенде кооптуулук жаратат. Ушундай учурларда бизге алып келишет. Кээде жолдон, парктан жабыркаган жалгыз калган жаныбарларды көрүп калгандар алып келип беришет“, — деди. Борбордо маймыл, карышкыр, элик, эшек, кой, коён жана башка жаныбарлар багылат. Алтынбеков бир айда эттен эле 100 килограмм керектелерин белгиледи. Мындан тышкары, канаттуулар үчүн жем, башка жандыктарга жашылча, дары-дармекке каражат керек. “Зоо Бишкек“ мамлекет тарабынан каржыланбайт. Негизинен жардам берген жарандардын эсебинен, азыраак пайызы зоопаркка келген көрүүчүлөрдүн төлөгөн каражатынан жабылат. Зоотехник жандыктарга жардам берүүнү каалагандар үчүн анын каалгасы ачык экенин кошумчалады.