Молитва Царственным Великомученикам

во Славу Божию МОЛИТВА ЦАРСТВЕННЫМ ВЕЛИКОМУЧЕНИКАМ О, свята́я седмери́це, Ца́рственнии великомученицы: царю Нико́лае, царице Алекса́ндро, царевичу Алекси́е, царевны Мари́е, О́льго, Татиа́но и Анастаси́е! Вы, сою́зом любве́ Христо́вы связу́еми, дом ваш, я́ко ма́лую Це́рковь, благоче́стно устро́или есте́ и смире́нием себе́ посреде́ земна́го вели́чия украси́ли есте́. В годи́ну же братоуби́йственныя бра́ни и гоне́ний безбо́жных во оте́честве на́шем, все упова́ние на Бо́га возложи́вше, о́браз терпе́ния и страда́ния всей земли́ Росси́йстей яви́ли есте́ и, моля́щеся о мучи́телех, клевету́, у́зы и изгна́ние, глумле́ние, насмея́ние и оболга́ние, убие́ние и теле́с поруга́ние му́жественне претерпе́ли есте́. Сего́ ра́ди от земна́го ца́рствия к Небе́сному прешли́ есте́ и те́плии хода́таи о нас яви́лися есте́. О, святы́й великомучениче, царю́-искупителю Нико́лае! Госпо́дь тя избра́ пома́занника Своего́, во е́же ми́лостивно и пра́во суди́ти лю́дем твои́м и храни́телем Це́ркве Правосла́вныя бы́ти. Сего́ ра́ди со стра́хом Бо́жиим ца́рское служе́ние и о душа́х попече́ние соверша́л еси́. Госпо́дь же, испыту́я тя, я́ко И́ова Многострада́льнаго, попусти́ тебе́ поноше́ния, ско́рби го́рькия, изме́ну, преда́тельство, бли́жних отчужде́ние и в душе́вных му́ках земна́го ца́рства оставле́ние. Вся сия́ ра́ди бла́га Росси́и, я́ко ве́рный сын ея́, претерпе́в, и, я́ко и́стинный раб Христо́в, му́ченическую кончи́ну прие́м, искупительный свой подвиг за возрождение Руси Православной совершив, Небе́снаго Ца́рства дости́гл еси́, иде́же наслажда́ешися Вы́шния сла́вы у Престо́ла всех Царя́, ку́пно со свято́ю супру́жницею твое́ю цари́цею Алекса́ндрою и ца́рственными ча́ды твоими. Призри милостивно на ны, грешныя и недостойныя, моли Христа Бога нашего, да отпустит Господь грех народа, не возбранившаго убиение твое, Царя и помазанника Божия, святой твоей Семьи и верных слуг твоих, предавшаго тебя молчанием, забвением, хулением дел твоих и великой жертвы твоей. Прости нас за богохульства, оскорбления и поругания имени твоего святаго, безбожныя лживыя наветы всякия на тя и весь род царский. Моли за ны, святый царю Николае, ибо дана тебе великая благодать от Господа молитися за ны, православныя люди и страну нашу. О, святи́и уго́дницы Бо́жии! Моли́теся о нас Бо́гу, да Це́рковь Свою в единомы́слии и тве́рдей ве́ре Господь наш соблюде́т и от еретичества избавит; спасет души наша от погибели вечныя; телеса наша сохранит от осквернения сатанинского и печатей антихристовых; Русь нашу ми́ром и благоде́нствием огради́т и от междоусо́бныя бра́ни и разделе́ния спасет; очистит от нечистивых власти наша, воздвигнет добропобедных мужей силы и разума, да восстановят и избавят от поругания Державу нашу. Молитеся за ны, святии Царственнии великомученицы, да избавит нас Христос Бог от обольщения близ грядущаго богомерзкаго и злохитраго антихриста и укроет в сокровенной пустыне Своего спасения. Еще веруем, яко по святым молитвам Вашим возставит нам Господь престол православных царей, воздвигнет на Руси Державнаго защитника – Царя Православнаго, Помазанника Божия. Еще молим Вас: укрепите нас крепостию и мужеством в годину тяжких испытаний, да не убоимся страха диавольскаго паче страха Божия и не отступим от исповедания имени Христа – Спасителя нашего и от Святей Церкви Его Православней. И да сподобимся Небеснаго Царствия, идеже купно с Вами и всеми новомученики и исповедники Церкви Русския прославим Отца, и Сына и Святаго Духа, ныне и присно и во веки веков. АМИНЬ. Величаем вас,/ святии Царственнии великомученицы,/ и чтим честная страдания ваша,/ яже за Христа и Святую Русь// претерпели есте.